Clément Marot

Transcription

Au Lecteur benevole. Salut.

Ja n'est besoing, Amy Lecteur, que davantage je te travaille les oreilles a te ramentevoir en quel ordre je t'avois par mes précedentes éditions reduit toutes les œuvres de nostre feu Marot. Car tu as peu voir, comme encores tu verras suyvamment le fil auquel jay cousu la plus expediente facilite, que j'ay sçu excogiter, pour te soulager a rechercher laquelle que tu voudras de tant de diverses pièces de ses labeurs : que je croy que tu auras receu autant agreable, comme trouve aisée a ta commodité, a laquelle j'ay toujours tasché de complaire. Et pour ce faire resequay tous ces injurieux tiltres, et non gueres moins propres après sa mort, que par luy vivant ils furent tolerables souz l'esperance que chacun attendoit toujours de luy quelque meilleure chose, comme il eust toujours meilleure sur le meurissement de ses ans, sil eust survescu nostre expectation. Et mesmement qu'en le filant en cet ordre nuement, et sans autre tiltre, que general, je ne pourrois faillir à luy accroistre son autorité envers la posterité, qui ne l'aura peu congnoistre de face, comme elle le congnoistra perpetuellement de nom, et de vertu. Et cuydois certainement (après que j'eus longtemps écouté si rien eschapperoit de la main d'Amys siens après son décès, et principalement de ceux qui ne se voudroient derober une telle injure que de luy celer aucune chose sienne en son absence) avoir clos et plié le dernier cayer de ses vertueuses Veilles, et par les derniers avoir planté but à tout espoir de ne rien voir davantage de luy. Mais la curieuse sollicitude de ses plus fidèles m'ha fait arracher cette colonne que j'avois fichée si assurément au désespoir d'un chacun, et me l'ha fait transporter plus oultre. Car de tant m'est bien advenu, que depuis peu de jours en ça j'ay recouvert plusieurs choses de luy; lesquelles tu jugeras assurément venuës de sa forge, si tu les daignes lire aux lieux où j'ay chacune colloquée sur le dernier de son rang, ainsi que l'ordre cy-après le declarera, si tu veux prendre la peine de conferer les ordres des presents aux derniers, que je ty mys en avant. Et tout ce ay-je fait, à celle fin, que la delectation dicelles te puisse esmouvoir a en rechercher d'autres siennes pour les mettre au nombre de celles cy; & si tu en estois davanture saisi de quelques-unes, de ne vouloir estre si injurieux au deffunct, et si ingrat au monde de les priver tous deux ensemble d'un bien si desirable. Et de ma part, pour l'obligation que je t'auray avec tout le reste du monde, j'esforceray davantage ce desir, qu'en ce faisant tu allumeras en moy, de veiller toujours plus intentivement a ton utilité, comme tu peux voir, que j'ay entendu en l'honneur du defunct toute ma possibilité a illustrer sa Metamorphose de figures assez joylment taillées : pour le moins telles, que jay peu pour te animer, et satisfaire à vouloir couronner l'œuvre de toute affection, ainsi qu'il est deu au mérite de l'Autheur, & à ta delectation.

De Lyon ce xx. d'Aoust 1549.

Summative English Translation

Transcription

Pource, amis Lecteurs, que par cy-devant je vous avois baillé les œuvres de Marot assez bien ordonnées et comparties, chacune matière en son lieu, non selon ma seule opinion, mais selon le jugement d'autres mieux entendus : & que j'ay congneu que tel ordre a esté bien reçu, et aussi que plusieurs autres l'ont suivy, cela m'a donné courage d'essayer de mieux faire, et prier les amis de l'autheur de m'y aider : a l'un desquelz me suis adressé, expert et entendu en la poésie francoise, pour avoir avis de luy, lequel non seulement m'en a donné conseil, mais luy-mesmes s'est offert, pour l'amitié qu'il avoit porté a l'Autheur, de m'aider a le revoir et racoustrer de la sorte, comme le pourrez voir en lisant qui est beaucoup mieux que par cy devant : tant de l'orthographe que de la ponctuation, et autres choses dignes d'estres emendées. En outres, j'ay recouvré, partie par son moyen, partie par autres, aucunes Epistres et Epigrammes de l'Autheur, lesquelz avons joinctz avec les autres sur la fin d'iceux, chacun en son rang. Aussi avons aperceu quelques Epigrammes faictz a l'imitation de Martial, qui estoient meslez avec ceux de son invention, comme celuy à Geoffroy Bruslard, à Benest, à Merlin de Saint Gelais, à Monsieur Castellanus, de Martin et de Catin, des Poëtes francois à Salel, lesquels avons mis en leur rang avec les autres faictz aussi a l'imitation de Martial, qui ont esté imprimez par cy devant à part, et hors du corps des œuvres : lesquels tous ensemble avons mis incontinent après les autres Epigrammes de son invention, combien qu'aucuns pourroient par avanture dire qu'ilz eussent mieux esté avec les traductions; mais toutefois au jugement de plusieurs seront mieux en cest endroit, même que ce n'est point totalement traduction, avec ce que sont toutes matières plaisantes, et presque toutes d'une couleur et suite. Nous avons pareillement mis les Oraisons après les Pseaumes, nous semblant chose plus convenante que d'estre au lieu où elles estoient par cy-devant : aussi que la plupart sont traductions. Vous trouverez le translat des deux premiers Livres de la Metamorphose orné de plusieurs belles figures appropriées selon que la Matière le requeroit. Nous avons osté les tiltres de l'Adolescence, Suite et Recueil, hors du corps de l'œuvre, pour ne le trop charger, et pour n'estre chose trop necessaire, et les avons seulement laissez en la table, pour le contentement d'aucuns, qui seroient peut estre curieux de scavoir le divers temps des compositions. Pourtant nous esperons que chacun demourra satisfaict de notre petit labeur, lequel prendrez en gré, en attendant d'autres livres en François que bien tost verrez en lumiere (Dieu aydant), dont le premier sera les Dialogues de Leon medico Hebreo, de la nature d'Amour, traduitz de l'Italien, lesquels vous donneront recreation et contentement, pour la belle matiere y contenuë, et non par cy-devant traictée en nostre Langue Françoise. Et adieu.

Summative English Translation